CONCERTO DE SOMOS III NA PRAZA DA FEIRA VELLA DE SILLEDA, XOVES 30 ÁS 10 DA NOITE

Logo do concerto de Chimango organizado pola Concellaría de Cultura e Turismo o pasado 8 de agosto e da boa acollida que tivo entre os silledenses, uns hostaleiros da vila dirixíronse a min coa idea de organizaren outro concerto e dinamizar as noites de verán na vila.
É polo que se respalda e colabora esta iniciativa de dous negocios hostaleiros locais, Restaurante Ricardo e Café Bar Pukará, ambos os dous situados ao pé da Praza da Feira Vella, para que o vindeiro xoves, 30 de agosto a partir das 10 da noite na devandita praza, teña lugar un concerto do grupo de Silleda, SOMOS III, integrado por Daniel Talquenca (guitarra) Paco Montoto (teclados e programación musical) e Carlos Montoto (voz), os cales interpretan fundamentalmente un repaso polo repertorio do pop-rock das décadas dos 80 e 90 no Estado español.
Esta interesante iniciativa pretende ser unha proba para experimentar se estas iniciativas teñen boa acollida do público, e conduzan a que, sobre todo, no verán vindeiro se poida pechar unha programación estival entre semana conxunta entre a hostalaría local e a Concellaría, nos núcleos urbanos de Trasdeza, Silleda e A Bandeira, que dinamice a actividade lúdica das vilas nas diversas rúas e prazas e sexa tamén un reclamo para os visitantes e turistas.

‘aCadaCanto’, chega ao Mosteiro de Carboeiro o vindeiro venres día 31 de agosto

O mosteiro de Carboeiro será o escenario dun novo concerto. A cita, o vindeiro venres día 31 de agosto será esta vez con aCadaCanto, o quinto traballo discográfico do selo Músicas de Salitre. Artistas coñecidos como Guadi Galego, Guillerme Fernández, Xavier Díaz e Xosé Lois Romero son os artífices do traballo resultante deste xuntoiro de artistas con traxectorias independentes. Aínda que xa teñen coincidido en moitas ocasións, esta é a primeira vez que os catro participan de forma conxunta. O disco foi publicado a mediados do pasado mes de maio.

A cita en Carboeiro será ás 21.30 horas, e as entradas terán un prezo de 10 euros en venda anticipada e de 12 euros na billeteira. A venda anticipada farase na Casa da Cultura de Silleda (986 581028; info@turismosilleda.es) o na mesma tarde no mosteiro.

A cita, programada dende a Concellaría de Cultura e Turismo, que dirixe Matías Rodríguez da Torre, vén sumarse á oferta cultural de verán.” Pese ás dificultades económicas, dende a Concellaría de Cultura e Turismo buscamos que poida haber durante o verán actividades culturais de grande calidade, polo que aínda haberá algunha cita máis antes que remate a tempada estival”, engade o concelleiro.

(Nota: o concerto será presentado a vindeira semana polos propios artistas en Silleda)

O Bandeirock será o 16 de Agosto

O 16 de Agosto teremos unha nova edición do Bandeirock. Desta volta, a partir das 22;30 teremos a oportunidade de ver a Barrio Rojo, Tu mujer nos engaña, malucos e malandros e máis unha banda sorpresa.

As actuacións terán lugar na rúa Camilo José Cela, en caso de que chova irase ao pavillón da Bandeira. 

O Esmorga Folk será o 17 de Agosto na Bandeira

...e coma sempre será na vila de A Bandeira. Desta volta virán:


-Tanto nos ten (de Redondela)
-Zurrumalla (de Vigo)
-Os Carapaus ( de Compostela)
-Os Cuchufellos (de Manzaneda)

As actuacións terán lugar desde as 22.30 horas

Bases para as subvencións en Cultura e Deporte

Poderán optar a estas subvencións as asociacións culturais e asociacións veciñais, educativas ou outras entidades sociais que presten servizos ou organicen actividades sen fin de lucro do tipo (organización de actividades que fomenten a cultura, a educación, o turismo ou a participación cidadá como cursos e obradoiros, celebracións tradicionais, viaxes, certames, etc.) e para gastos en infraestruturas e equipamento cultural.

Este ano como novidade pódense recoller no Rexistro do Concello todos os modelos precisos para presentar, e mesmo descargalos desde o sitio web www.silleda.es


As bases están publicadas no Boletín Oficial da Provincia do luns 6 de Agosto , a partires da páxina 64. 

Chimango Comando rumbero, presenta en Silleda o seu disco "Donde el diablo perdió el Poncho", o mercores 8 Agosto na Praza da Feira Vella as 10 da noite.

Chimango presenta "Donde el diablo perdió el poncho", en tour galego, ao que se sumou Silleda (8 de Agosto en Praza do Feira vella). A concellaria de Cultura e Participacion Cidada decidiru engrosar a programación estival con esta proposta actual de música mestiza adubiada co sabor tropical de O Drakesito, os mellores mojitos cubanos de Galicia.
En formato trío baixo o apelativo de Comando rumbero, presentarán unha música avalada por figuras como Manu Chao, Tonino Carotone, Anouk  Chauvet (Fufu-ai), quen colaboran neste novo disco do arxentino  afincado en Barcelona, Pablo Pascuale. 

A Xunta de Goberno Local acordou iniciar o procedemento para a adxudicación do programa lúdico educativo fóra do horario lectivo

A Xunta de Goberno Local de Silleda acordou hoxe, entre outros asuntos, iniciar o procedemento para contratar o servizo do programa lúdico-educativo de apertura de centros escolares públicos fóra do horario lectivo. Farase, ao igual que o ano pasado por procedemento negociado con publicidade.

Este servizo está dirixido a nenos/as de entre 3 e 12 anos, con actividades nos centros escolares fora do horario lectivo, e tamén durante as vacacións.

O procedemento está aberto a todas aquelas empresas interesadas e que cumpran cos requisitos lúdico educativos que esixen as bases. Os pregos, coas condicións tanto técnicas como administrativas, xa se poden consultar na web municipal, no apartado Perfil do Contratante (sección servizos).

As empresas que queiran concorrer dispoñen dun prazo de 15 días naturais, contados a partir de mañá día 4. O prezo polo que se licita o servizo é o mesmo ca o do ano pasado: 80.000 euros.

Na adxucación, teranse en conta unha serie de criterios obxectivos e tamén subxectivos. En canto aos obxectivos, atenderase ao prezo ofertado, facendo fincanpé en que as empresas deben de presentar unha distribución salarial dos traballadores. Esta cuestión puntuarase con 4 puntos.

Tamén se terá en conta o número de monitores. Así valorarase en 0,5 puntos, e ata un máximo de 1,5 (máximo 3 puntos) cada monitor que propoñan as empresas a maiores. No prego esíxense contar con persoal técnico axeitado para o desenvolvemento da actividade de cara a atender 90 nenos e nenas. Entre os persoal que se pide figura: unha persoa con titulación de Mestre, diplomada en Educación Infantil ou Primaria; 4 monitores de Tempo Libre ou equivalente, un licenciado en Psicoloxía, Psicopedagoxía, ou Pedagoxía na especiacidade escolar; un titulado/a en Educación Social; e unha persoa para servizos con carné de manipulador de alimentos. Debe respetarse unha ratio mínima de 1 coidador/a por cada 12 nenos/as. Así mesmo, debe nomarse por parte da empresa un director/a ou coordinador/a para toda a actividade.

O concelleiro de Educación, Matías Rodríguez da Torre, explica que “básicamente o que se fixo foi simplificar os criterios obxectivos, de feito, cos criterios citados anteriormente, tamén se busca que poidan concorrer empresas que aínda que non teñan experiencia no servizo, sí conten cunha programación lúdica e educativa”, engade.

Así, nos criterios subxectivos, terase en conta o programa educativo que se presente, valorando sobre todo a súa multidisciplinariedade. Este será o criterio que máis puntue, con 5 puntos.

Da Torre tamén explica que como novidade este ano se encargará un informe sobre o programa lúdico a un membro do recén creado Consello Municipal de Educación. “Será un especialista na sección de idade á que se dirixe o servizo, contando contando co seu asesoramento á hora de valorar os programas”, engade o concelleiro.

AS BASES DE SUBVENCIÓNS DE CULTURA ESTÁN PREPARADAS E APROBADAS

A Concellaría de Cultura do Concello de Silleda que dirixe o Concelleiro do BNG, Matías Rodríguez da Torre, anunciou que logo de saíren os orzamentos municipais, o pasado venres se aprobaron as bases de subvencións para actividades culturais dirixidas ás asociacións rexistradas no rexistro municipal. A estas agora quédalle un último trámite que é a publicación dixital no Boletín Oficial da Provincia da Deputación Provincial, polo que o Concelleiro agarda que en setembro como máximo estean ao dispor dos colectivos para estes poder presentar os seus proxectos.

Este ano dotáronse con 39.000 euros, aproximadamente un 20% menos que as concedidas o ano anterior, e poderán optar a estas subvencións as asociacións culturais e asociacións veciñais, educativas ou outras entidades sociais que presten servizos ou organicen actividades sen fin de lucro do tipo (organización de actividades que fomenten a cultura, a educación, o turismo ou a participación cidadá como cursos e obradoiros, celebracións tradicionais, viaxes, certames, etc.) e para gastos en infraestruturas e equipamento cultural, todos no período comprendido entre o 1 de xaneiro e o 10 de decembro de 2012.

Desde a Concellaría de Cultura tentáronse simplificar os trámites para a presentación da documentación, polo que se subirán á web municipal e o blogue de participación cidadá modelos de toda a documentación a presentar, fichas que tamén se poderá recoller no propio Concello, e que axudarán a estandarizar a información presentada polos interesados, aos cales se lles avaliará até 10 puntos a antedita documentación en base aos seguintes criterios,

-       Interese xeral e calidade das actividades a desenvolver. (até 4 puntos)

-       Número de beneficiarios directa ou indirectamente. (até 2 puntos)

-       Carácter permanente ou periódico das actividades obxecto de subvención, en base ao número de actividades ou proxectos realizados ou con proxección de cara ao futuro. (até 2 puntos)

-        Contribución á normalización da lingua e cultura galegas. (até 2 puntos)

O Concelleiro tamén deixou claro que  non serán subvencionábeis os gastos de mantemento ordinario: auga, luz, gas, comidas e bebidas e teléfono. Só se admitiran os gastos provenientes de seguros ou alugueiros se estiveren directamente relacionados coas actividades obxecto da subvención. E tamén se ofrece a novidade da posibilidade de cobranza anticipada até un máximo do 50% dos gastos coa pertinente xustificación dos mesmos. En palabras de Matías R. da Torre “as subvencións teñen que servir para colaborar ao máximo naqueles actividades que teñn un fundamento cultural, priorizando as que aposten pola formación, o desenvolvemento turístico e a participación veciñal”

OS XENERAIS DA BANDEIRA REPRESENTARON UN ATRANCO NA FREGUESÍA DE VILA DE PUNHE, VIANA DO CASTELO, PORTUGAL.

O pasado sábado 14 de xullo os Xenerais da Bandeira estiveron representando aos Xenerais da Ulla no festival de Teatro Popular do eixo Atlántico celebrado no lugar de Largo das Neves na freguesía portuguesa de Vila de Punhe, pertencente a cámara municipal de Viana do Castelo. No festival de teatro organizado pola cámara de Viana de Castelo e o Auto das Floripes participaron colectivos da Galicia como os Xenerais da Bandeira e veciños e veciñas do Concello Lucense de Cervo, xunto a colectivos de teatro popular da zona do eixo atlántico Portugués.

Os Xenerais da Bandeira representaron o sábado 14 ás 18 h un atranco de seis xenerais con correos e sentinelas, no que reflexaron un bando invasor da Galicia e un bando defensor de Portugal. As súas arengas trataron temas de actualidade Portuguesa e Galega sen esquecer que os dous países son irmáns compartillando mesma cultura e agora rescate económico, así como tamén se fixeron alusións o uso elevado de galeg@s do aeroporto internacional de Porto, a figura de Cristiano Ronaldo, referencias aos xenerais da revolución dos caraveis ou a reconquista dos territorios galaicos da época de Gallaecia.

É de sinalar que se estableceron contactos co colectivo organizador, Auto das Floripes, tanto por parte da Concellería de Cultura de Silleda como polos organizadores para comezar unha vía de comunicación cara a posibilidade de que na vindeira edición se poida realizar unha xornada do Eixpressoes na Bandeira. ´

Hai que lembrar que o festival continúa nesta vindeira fin de semana en Xinzo da Limia, no que estarán presentes os Moros e Cristianos do Auto das Floripes, e remata na fin de semana do 28 e 29 de xullo en Viana do Castelo con representacións das pantallas, cigarróns, peliqueiros, da Maruxaina do norte de Lugo e os Xenerais de Vedra.

A II Romaría da Fervenza de Escuadro será o vindeiro sábado 21 de Xullo

    Esta mañá tivo lugar, na Casa da Cultura de Silleda a presentación da Romaría da Fervenza de Escuadro, na cal estiveron presentes do concelleiro de Cultura, Matías Rodríguez da Torre e mais representantes da directiva da Asociación O Son da Ferveza.

Un día cheo de música e lecer, que contará coa participación dos seguintes grupos:

- Bico da Balouta, Agolada

- O Arco de Merza (Vila de Cruces)

- Lume na Lareira, (A Estrada)

- Almuíña Pandereteiras,(Escuadro)

- Pao de Buxo, (Saídres)

- Pandereteiras de Curantes (A Estrada)

- Camballeira, (A Estrada

- Ruadeiras de Loimil (A Estrada)

- Gaiteiros da Pereiriña (Ansemil-Martixe)

- O Son da Fervenza, (Escuadro).

O programa para ese día de festa será o segunte:

-          A partir das 12:00 h. da mañá, os Grupos participantes farán a súa presentación coa interpretación de tres pezas.

-          Pregón a cargo de D. Rafael Agulló Albors ( Director da Banda Municipal da Silleda e Coro da Fervenza ).

-          Unha vez rematado o Pregón todos os Grupos interpretarán conxuntamente o Pasodobre de “ San Roque “.

-          A continuación comida campestre para todos os que queiran asistir. Haberá postos de bar, pulpeiros, rosquilleiras e artesáns.

-          Comida de confraternidade de tódolos Grupos.

-          A partir das catro da tarde actuación de todos os Grupos asistentes ( A duración será duns 45 minutos por grupo, aproximadamente ).

-          Cea de confraternidade.

-          Foliada para todos os que o desexen.

-          Haberá festa ata que o corpo aguante.

-          Haberá café para todo e toda durante todo o día

O Xenerais da Bandeira estarán presentes no Encontro de Teatro Popular do Eixo Atlántico

Será o sábado 14 de Xullo en Largo das Neves (Viana do Castelo, Portugal) onde os Xenerais da Bandeira farán unha demostración das súas arengas, dentro desta senlleira mostra de teatro, demostrando o particular caracter do Entroido da Ulla.

Unha foto antiga do "Entroido dos Xenerais" na Bandeira

Xirandola celebra o seu primeiro cuarto de século!

..e fíxoo cunha marabillosa representación da tradicional feira da Bandeira.

Silleda súmase ao proxecto ‘Goza do Ulla’, cun roteiro polo Baixo Deza

O Concello de Silleda vén de sumarse ao proxecto Goza do Ulla, una iniciativa posta en marcha hai xa dous anos, coa realización de roteiros de sendeirismo nos municipios que forman parte da ribeira do Ulla. A cita con Silleda está prevista para o vindeiro día 12 de outubro. O roteiro proposto é o do Baixo Deza, cunha distancia de 11,4 kilómetros, a realizar nun tempo estimado de 4 horas e cunha dificultade meda.

O percorrido deseñado pola Concellaría de Turismo de Silleda parte da Mámoa da Chousa Nova, na parroquia de Abades, e remataría no lugar de Fucarelos (Cira), no lugar onde o Deza verte as súas augas ao Ulla. Este roteiro mestura patrimonio histórico, cultural e natural. Así, ademais da Mámoa de Abades, os participantes poderán contemplar monumentos coma as igrexas románica e barroca desta mesma localidade, o templo románico de San Martiño de Dornelas, espazos naturais coma os cachóns do Mallo (no río Cervañiña) ou da Zanca, en Dornelas, o pazo de Peizás ou a torre do castelo de Cira.

“Con esta iniciativa ábrense tamén novas perspectivas de colaboración, ademais de axudar a dar a coñecer as potencialidades no plan turístico de Silleda”, sinala o concelleiro de Turismo, Matías Rodríguez da Torre, que hoxe asistiu a un encontro no Concello de Vedra sobre esta proposta. Foi precisamente a raíz da xuntanza dos concellos que comparten a tradición do Entroido da Ulla como xurdiu a posibilidade de pasar a formar parte deste programa, que entre este mes de xullo e o de novembro percorrerá un total de 19 municipios, dende o nacemento do Ulla ata a súa desembocadura. “O Ulla é o segundo río galego máis importante, e tamén un puntal a nivel turístico”, engade Da Torre.

O calendario previsto para os  roteiros comezará este mes en Monterroso, (o día 14), para continuar en Boqueixón (día 21 de xullo). No mes de agosto celebraranse os roteiros de Touro (día 5), Arzúa (día 11); Vedra (18); Teo (26 de agosto); Pontecesures (2 de setembro); Padrón (8 de setembro); Catoira (16 de setembro); Palas de Reis (22 de setembro); Rianxo (29 de setembro);   Valga (6 de outubro); Silleda (12 de outubro); Antas de Ulla (14 de outubro); Dodro (20 de outubro); Vila de Cruces (27 de outubro); Santiso (3 de novembro); Agolada (10 de novembro) e A Estrada (18 de novembro

Festa do Lacón na vila de Silleda

A capital do concello acollerá unha nova edición da festa  que honra a un dos noso produtos máis senlleiros: o lacón, que desta volta vén cunha sobranceira programación festeira.

PROGRAMA DAS FESTAS DO VERÁN DE SILLEDA 2012

Venres, 6 de xullo:

-          Ás 20:00, Chupinazo das Festas diante da Casa da Cultura

-          Concerto da BANDA XUVENIL DE SILLEDA na Praza do Siñor Afranio

-          XIV FESTA DO LACÓN na Praza da Feira Vella

-          Actuación dun dúo e unha charanga polas rúas da vila

Sábado, 7 de xullo:

-          A partir das 11,30 h, Pasarrúas e concerto no Parque a cargo da BANDA DE GAITAS DO CONCELLO DE FORCAREI

-          Ás 17:00, Festa do Rapaz na Praza da Igrexa

-          Ás 20:00, Concerto da BANDA DE MÚSICA MUNICIPAL DE SILLEDA na Praza do Siñor Afranio

-          Gran verbena coas orquestras: CLAXON e TROPICANA

Domingo, 8 de xullo:

-          Ás 12:00, Misa cantada pola CORAL POLIFÓNICA TRASDEZA

-          Ás 13:30, Concerto no Parque a cargo da BANDA DE MÚSICA MUNICIPAL DE SILLEDA

-          Ás 20,00, Concerto da BANDA DE MÚSICA MUNICIPAL DE SILLEDA na Praza do Siñor Afranio

Nesta xornada haberá prezos especiais nas atraccións

Venres, 13 de xullo: REFESTA

-          Ás 21:00, Sorteo das Festas na Casa da Cultura de Silleda

-          Pola noite, espectacular verbena coas orquestras: ISRAEL e ALASKA

Organiza: Comisión de Festas do Verán 2012

Colabora: Concellaría de Turismo e Participación Cidadá do Concello de Silleda

Xirandola organiza un grande festival polo seu XXV aniversario na Bandeira

Baixo o nome de "Onde resoa o cantar...", o sábado 7 de Xullo, na praza da Feira na Bandeira, o grupo de baile da Bandeira "Xirandola" organiza un grande festival que contará con música e baile, nunha recreación da antiga feira da Bandeira, alén de teren como convidado ao grupo "Brisa de Portmany" da illa de Eivissa.