Mercapoemas – Comercio en Galego e Ceibar Poemas son dúas actividades enmarcadas na programación da semana do día das Legras Galegas que organiza a Concellaría de Cultura e Participación Cidadá que dirixe Matías R. da Torre.
Mercapoemas, que leva o lema Comercio en Galego foi unha proposta da plataforma Queremos Galego, e realizarase coa colaboración da asociación de Empresarios e Comerciantes de Silleda e a devandita concellaría. Consiste na colocación de poemas nos escaparates das tendas de membros de ECOS, para que os que pasen xunto a eles poidan gozar deste xénero. Os versos serán poemas de Valentín Paz Andade, Celso Emilio Ferreiro,xa que en agosto cúmprese un século dende o seu nacemento ou versos destacados da nosa lingua.
Esta actividade levarase a cabo o día 15 de maio, e rematará o 19.
Tamén este día 15, os viandantes que transiten polo casco urbano de Silleda ou por Bandeira atoparán, en diferentes puntos, sobres con poemas en galego. Estes poderán estar por calquera lugar público para que, quen atope algún, poida lelo e logo ou ben volvelo deixar onde estaba para que outra persoa poida gozar da obra, ou deixalo noutro lugar, ou ben gardalo.
Dende a Concellaría de Cultura perséguese o obxectivo de achegar a literatura galega á vida cotiá das persoas, e que os silledenses poidan gozar dos poemas de grandes autores de Galicia.
No hay comentarios:
Publicar un comentario